កូវីដ១៩ ឆក់យកជីវិតមនុស្សជាតិ ជិត៣លាននាក់

បរទេស៖ គិតចាប់តាំងពីការលេចឡើង នៃវីរុសកូរ៉ូណា ហៅ «កូវីដ-១៩» (Coronavirus Disease 2019) នៅក្នុងអំឡុងខែធ្នូ ឆ្នាំ២០១៩ នៅក្នុងទីក្រុងវូហាន ខេត្តហ៊ូប៉ី នាភាគកណ្ដាល ប្រទេសចិន រហូតមកដល់ថ្ងៃទី២២ ខែមីនា ឆ្នាំ២០២១ កូវីដ-១៩បាន និងកំពុងរាតត្បាត នៅលើដែនដី និប្រទេស ចំនួន២១៩។

បើតាមគេហទំព័រ Wordometer បានចេញផ្សាយ នៅព្រឹក ថ្ងៃទី២២ ខែមីនា ថា នៅលើពិភពលោក មានអ្នកឆ្លងកើនជិតដល់​ ១២៤លាននាក់ និងស្លាប់ ជិត៣លានានាក់។ ក្នុងចំណោមអ្នកជំងឺទាំងនោះ មានអ្នកជាសះស្បើយជិត១០០លាននាក់ ហើយអ្នកជំងឺ ជាង២១លាននាក់កំពុងសម្រាកព្យាបាល ដោយក្នុងនោះមានអ្នកឈឺធ្ងន់ ជាង៩០ ០០០នាក់​។

សហរដ្ឋអាមេរិក នៅតែជាប្រទេសមានអ្នកឆ្លង និងស្លាប់ច្រើនជាងគេ នៅលើពិភពលោក។ រីឯប្រទេសដែលមានអ្នកឆ្លងច្រើន បន្ទាប់ពីអាមេរិក រួមមាន ប្រេស៊ីល ឥណ្ឌា រុស្ស៊ី អង់គ្លេស បារាំង អ៊ីតាលី អេស្ប៉ាញ តួកគី អាល្លឺម៉ង់….ជាដើម៕