ពិតជាមោទនភាព​ណាស់! សូម្បីតែមហាសេដ្ឋីចិន ចេក ម៉ា (Jack Ma) ក៏មិនជិនណាយនឹងស្ញើចសរសើរ នូវភាពអស្ចារ្យ នៃប្រាសាទបុរាណខ្មែរ​ មិនសសើរមិនបាន!

166
CMA_LongBanner

ខេត្តសៀមរាប៖ បើតាមការចុះផ្សាយរបស់ក្រសួងវប្បធម៌ និងវិចិត្រសិល្បៈ​ នៅថ្ងៃទី១២ ខែមីនា ឆ្នាំ២០១៩នេះ គឺបញ្ជាក់ថា៖ មហាសេដ្ឋីចិន លោក ចេក ម៉ា បានបង្ហាញនូវការស្ញើចសរសើរនូវភាពអស្ចារ្យនៃប្រាសាទខ្មែរដ៏អស្ចារ្យ ពេលលោកបានទស្សនាប្រាសាទនានាក្នុងតំបន់អង្គរ។

ដោយក្រសួងចាត់ទុកថា៖ ភាពល្បីល្បាញនៃរមណីយដ្ឋានអង្គរ មិនត្រឹមតែទាក់ទាញអ្នកស្រាវជ្រាវ និងភ្ញៀវទេសចរទូទៅប៉ុណ្ណោះទេ បុគ្គលល្បីៗក្នុងលោក រួមនឹងអ្នកមានៗលំដាប់ពិភពលោកច្រើនរូប ក៏ទាក់ចិត្តមិនខកខានក្នុងដំណើរមកទស្សនាអង្គរដែរ។ 

គួរបញ្ជាក់ថា៖ នៅថ្ងៃទី១២ ខែមីនា ឆ្នាំ២០១៩នេះ ចាត់ទុកជាថ្ងៃពិសេសមួយទៀត ដែលមហាសេដ្ឋីចិនលំដាប់ពិភពលោក និងជាប្រធានក្រុមហ៊ុន Alibaba គឺ លោក ចេក ម៉ា (Jack Ma) បានមកបំពេញទស្សនកិច្ចពេញមួយថ្ងៃនៅប្រាសាទនានាក្នុងតំបន់អង្គរ។

អគ្គនាយករងនៃអាជ្ញាធរជាតិអប្សរា លោក សុខ សង្វារ ដែលបានជូនដំណើរលោក ចេក ម៉ា Jack Ma ទស្សនាប្រាសាទអង្គរវត្តបានបញ្ជាក់ថា៖ លោក ចេក ម៉ា ជាមនុស្សសុភាពគួរឲ្យគោរព។ ថ្វីត្បិតលោកជាមហាសេដ្ឋី តែឥរិយាបថរបស់លោកបានបង្ហាញនូវការគោរព ផ្តល់តម្លៃយ៉ាងខ្លាំងចំពោះប្រាសាទខ្មែរ។ លោកបានសួរសំណួរនានាដែលពាក់ព័ន្ធ នឹងការគ្រប់គ្រងប្រាសាទ ក្នុងភាពជាអ្នកចង់ចេះដឹងពិតប្រាកដ និងផ្តល់ការគោរពយ៉ាងជ្រាលជ្រៅចំពោះអង្គរ។

លោក សុខ សង្វារ បានបញ្ជាក់ថា តាមការបញ្ជាក់របស់លោក ចេក ម៉ា លោកពិតជាស្ញើចសរសើរ នូវភាពអស្ចារ្យនៃប្រាសាទខ្មែរ និងកោតសរសើរនូវការគ្រប់គ្រងរមណីយដ្ឋានអង្គរ ប្រកបដោយការទទួលខុសត្រូវខ្ពស់។

លោកអគ្គនាយកបញ្ជាក់ថា៖ លោក ចេក ម៉ា Jack Ma បាននិយាយថានឹងមកកាន់រមណីយដ្ឋានអង្គរនាឱកាសក្រោយទៀត ដោយការធ្វើដំណើររបស់លោកនាពេលនេះ គ្រាន់តែជាលើកដំបូងប៉ុណ្ណោះ តែច្បាស់ណាស់នឹងមានលើកទី២ ឬទី៣បន្តទៀត ។

លោក សុខ សង្វារ ជឿជាក់ថា តាមរយៈវត្តមានរបស់លោក ចេក ម៉ា Jack Ma ក៏ដូចជា បុគ្គលល្បីៗផ្សេងទៀតក្នុងពិភពលោកក្នុងការមកទស្សនារមណីយដ្ឋានអង្គរ ពិតជាធ្វើឲ្យភ្ញៀវទេសចរគ្រប់ជាតិសាសន៍ កាន់តែចាប់អារម្មណ៍ ហើយមកទស្សនារមណីយដ្ឋានអង្គរកាន់តែច្រើនឡើងៗជារៀងរាល់ឆ្នាំបន្ថែមទៀត។ 

ចំណុចនេះបានបង្ហាញអោយពិភពលោក បានឃើញភាពរីកចម្រើន សុខសន្តិភាព នៅកម្ពុជា មកឃើញផ្ទាល់ភ្នែកទើបមិនជិនណាយ និងការស្ញើចសសើរ៕ (ម៉េង)

GoldenSky-LongBanner
អត្ថបទដែលជាប់ទាក់ទង
Open

Close