គ្រូពេទ្យស្ម័គ្រចិត្តរបស់រដ្ឋមន្ត្រីក្រសួងព័ត៌មាន ចុះពិនិត្យព្យាបាលជំងឺ ជូនពលរដ្ឋដោយឥតគិតថ្លៃ នៅឃុំព្រែកតានង់ ស្រុកកោះសូទិន

228
UI Promtion 2021

(កំពង់ចាម)៖ ជាការចូលរួមចំណែកលើកកម្ពស់សុខមាលភាពជូនដល់ប្រជាពលរដ្ឋ ពិសេសអ្នកដែលរស់នៅទីជនបទឲ្យមានសុខភាពល្អនោះ លោក អ៊ុក សំរេច រដ្ឋលេខាធិការក្រសួងព័ត៌មាន និងជាប្រធានក្រុមការងារចុះមូលដ្ឋានឃុំព្រែកតានង់ រួមជាមួយវត្តមាន លោក ទន់ សារ៉ាត រដ្ឋលេខាធិការ ក្រសួងព័ត៌មាន និងលោក ឈិត គឹមយាត សមាជិកព្រឹទ្ធសភា បានជាអធិបតីក្នុងពិធីបើកការពិនិត្យពិគ្រោះនិងព្យាបាលជំងឺ ជូនដល់ប្រជាពលរដ្ឋ ដោយឥតគិតថ្លៃ នៅឃុំព្រែកតានង់ ស្រុកកោះសូទិន ខេត្តកំពង់ចាម ព្រឹកថ្ងៃទី២៣ ខែមេសា ឆ្នាំ២០២២ នាបរិវេណសាលាបឋមសិក្សាព្រែកតានង់ក្នុង។
នៅក្នុងឱកាសនោះ លោក អ៊ុក សំរេច បាននាំយកនូវថវិកាចំនួន ៥ លានរៀល របស់លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងជាប្រធានក្រុមការងារចុះមូលដ្ឋានស្រុកកោះសូទិន ជូនដល់ក្រុមគ្រូពេទ្យស្មគ្រ័ចិត្ត លោក ខៀវ កាញារីទ្ធ ផងដែរ។ ជាមួយគ្នានេះដែរ លោក ឈិត គឹមយាត ក៏បានផ្តល់ថវិកាចំនួន ១លានរៀល ដល់ក្រុមគ្រូពេទ្យ។

លោក សៅ សំបូរ ទីប្រឹក្សាក្រសួងព័ត៌មាន និងជាប្រធានក្រុមគ្រូពេទ្យស្មគ្រ័ចិត្ត លោក ខៀវ កាញារីទ្ធ បានលើកឡើងថា ក្រុមគ្រូពេទ្យដែលបានមកឃុំមហាខ្ញូង នាឱកាសនេះ ដើម្បីជួយធ្វើការពិនិត្យពិគ្រោះព្យាបាលជំងឺ ជូនប្រជាពលរដ្ឋ ដោយឥតគិតថ្លៃ និងមិនប្រកាន់និន្នាការនយោបាយ ហើយសកម្មភាពការងារមនុស្សធម៌នាឱកាសនេះ សបញ្ជាក់នូវការយកចិត្តទុកដាក់គិតគូរពីសណាក់លោក ខៀវ កាញារីទ្ធ និងភរិយា លើកបញ្ហាសុខទុក្ខ សុខមាលភាពរបស់ប្រជាពលរដ្ឋនៅមូលដ្ឋាន។
សមាសភាពក្រុមគ្រូពេទ្យស័្មគ្រចិត្ត លោក ខៀវ កាញារីទ្ធ មានចំនួន៥៨នាក់ ក្នុងនេះ១៣នាក់ មានវត្តមានជាប្រចាំគឺ វេជ្ជបណ្ឌិត ទន្តបណ្ឌិត គ្រូពេទ្យ ទន្តគិលាននុបដ្ឋាក និងនិស្សិត ទន្តគិលាន ចំនួន៤នាក់។ រីឯ៤០នាក់ទៀត ជាគិលានុបដ្ឋាកយិកា ឆ្មប នៅមន្ទីរពេទ្យស្រុកកោះសូទិន មណ្ឌលសុខភាពទាំង៧ និងបុគ្គលិកការិយាល័យ សុខាភិបាលស្រុកកោះសូទិន។ សម្រាប់ថ្ងៃនេះដែរ ក៏មានគិលានុបដ្ឋាក ១៥នាក់ ចូលរួមសហប្រតិបត្តិការ ដែលមកពីមណ្ឌលសុខភាពមហាខ្ញូង ព្រែកតានង់ និងកំពង់រាប ដែលស្ថិតនៅភូមិសាស្រ្តក្បែរគ្នា។
លោក អ៊ុក សំរេច បានលើកឡើងថា បច្ចុប្បន្នជំងឺកូវីដ១៩ នៅតែមាននៅឡើយ តែជាសំណាងសម្រាប់ប្រទេសកម្ពុជា មានវ៉ាក់សាំងគ្រប់គ្រាន់ ដើម្បីចាក់ជូនប្រជាពលរដ្ឋ ដោយមិនធ្វើឲ្យមានការស្លាប់ដោយសារជំងឺនេះច្រើននោះទេ។ តែទោះបីជាយ៉ាងណា មិនត្រូវភ្លេចថែរក្សាសុខភាព និងអនុវត្ត ៣ការពារ និង៣កុំឲ្យបានត្រឹមត្រូវដដែល។
លោកបន្តថា តាមរយៈការពិនិត្យព្យាបាលជំងឺ គឺសម្រាប់តែអ្នកមានជំងឺស្រាលតែប៉ុណ្ណឹង តែធ្ងន់គឺត្រូវបញ្ជូនទៅកាន់មន្ទីរពេទ្យខេត្តកំពង់ចាម តាមរយៈរថយន្តសង្គ្រោះបន្ទាន់ មន្ទីរពេទ្យបង្អែក ស្រុកកោះសូទិន ដែលជាអំណោយ លោកត្រូវបានយកមកប្រចាំការនៅទីនេះ។
ឆ្លៀតក្នុងកាសនេះ លោក អ៊ុក សំរេច បានអរគុណដល់ក្រុមកាងារគ្រូពេទ្យ និងនិសិ្សតគិលាននុបដ្ឋាក ដែលតែងតែបានចូលរួមឈឺឆ្អាលគ្រប់ពេល ដោយស្មគ្រ័ចិត្ត ក្នុងការពិនិត្យព្យាបាលជំងឺជូនដល់ប្រជាពលរដ្ឋ ក្នុងស្រុកកោះសូទិន។
ប្រធានក្រុមការងារ គ្រូពេទ្យស្មគ្រ័ចិត្ត បានថ្លែងនូវអំណរគុណចំពោះលោក ខៀវ កាញារីទ្ធ, លោកស្រីប្រធានកិត្តិយស ក្រុមគ្រូពេទ្យស្ម័គ្រចិត្ត និងលោក អ៊ុក សំរេច ប្រធានក្រុមការងារចុះជួយឃុំព្រែកតានង់ ព្រមទាំងប្រធានក្រុមការងារចុះជួយឃុំ ទាំង៧ ដែលបានជួយឧបត្តម្ភ គាំទ្រទាំងស្មារតី និងថវិកា ដល់ក្រុមគ្រូពេទ្យសម្រាប់ជាមធ្យោបាយ សម្ភារៈ និងឱសថផ្តល់ជូនអ្នកជំងឺពេលពិនិត្យរួចរាល់។ ដូច្នេះការចូលរួមទាំងនេះ ជាកម្លាំងសក្តានុពលលើកទឹកចិត្ត ឲ្យក្រុមគ្រូពេទ្យស្ម័គ្រចិត្តទាំងអស់គ្នាកាន់តែមានឆន្ទៈ ចូលរួមកិច្ចការមនុស្សធម៌បន្តទៀត តាមការចង្អុលបង្ហាញពីលោករដ្ឋមន្ដ្រី៕