អាម៉េរិក និងអ៊ីស្រាអែល នឹងចុះហត្ថលេខាលើកិច្ចសន្យារួមមួយ ក្នុងគោលបំណងរារាំងអ៊ឺរ៉ង់ពីការផលិតអាវុធនុយក្លេអ៊ែរ

74
UI Promtion 2021

ប្រធានាធិបតីអាម៉េរិក លោក ចូ បៃឌិន និងនាយករដ្ឋមន្ត្រីអ៊ីស្រាអែល លោក យ៉ែរ ឡាផីដ (Yair Lapid) នឹងចុះហត្ថលេខាលើកិច្ចព្រមព្រៀងរួមមួយ នៅថ្ងៃព្រហស្បតិ៍ ទី១៤ ខែកក្កដា ដោយសន្យាថានឹងរារាំងប្រទេសអ៊ីរ៉ង់ ពីការផលិតអាវុធនុយក្លេអ៊ែរ ក្នុងថ្ងៃទីពីរនៃដំណើរទស្សនកិច្ចនៅមជ្ឈិមបូព៌ារបស់លោក បៃឌិន។

មន្ត្រីរដ្ឋបាលជាន់ខ្ពស់របស់លោក បៃឌិន បានឱ្យដឹងថា កិច្ចព្រមព្រៀងនេះនឹងពង្រីកទំនាក់ទំនងសន្តិសុខយូរអង្វែងរវាងសហរដ្ឋអាម៉េរិក និងអ៊ីស្រាអែល។ មន្ត្រីរូបនេះបានថ្លែងយ៉ាងដូច្នេះថា៖ «សេចក្តីប្រកាសនេះ មានសារសំខាន់ណាស់ ហើយវារួមបញ្ចូលទាំងការប្តេជ្ញាចិត្ត ដែលមិនអនុញ្ញាតឱ្យអ៊ីរ៉ង់ផលិតអាវុធនុយក្លេអ៊ែរ និងដើម្បីដោះស្រាយសកម្មភាពអស្ថិរភាពរបស់អ៊ីរ៉ង់ ជាពិសេសការគំរាមកំហែងដល់អ៊ីស្រាអែល»។

លោក បៃឌិន បានលើកឡើងថា គម្រោងការរបស់ប្រទេសអ៊ឺរ៉ុងក្នុងការផលិតអាវុធនុយក្លេអ៊ែរ បានកើនឡើងខ្លាំងជាងពេលកន្លងទៅ។ លោកបន្ថែមថា ប្រសិនបើអ៊ឺរ៉ុងនៅតែបន្តរឹងទទឹងខ្លាំង សហរដ្ឋអាម៉េរិក នឹងដោះស្រាយដោយប្រើកម្លាំងយោធាប្រាកដណាស់។

យ៉ាងណាមិញ អ៊ីរ៉ង់​បដិសេធ​ពីកម្មវិធី​នុយក្លេអ៊ែរ​របស់​ខ្លួន ថា​មាន​គោល​ដៅផលិត​អាវុធ​នុយក្លេអ៊ែរ។

គួរបញ្ជាក់ថា លោក បៃឌិន ដែលកំពុងធ្វើ​ដំណើរ​ទស្សនកិច្ច​នៅ​មជ្ឈិមបូព៌ា​លើក​ដំបូង ​ចាប់​តាំង​ពី​ចូល​កាន់​តំណែង​នៅ​ដើម​ឆ្នាំ ២០២១ បានចុះចតនៅក្នុងទីក្រុង ​Tel Aviv នៅថ្ងៃពុធ និងបាន​ពិភាក្សា​ជាមួយ​មេដឹកនាំ​អ៊ីស្រាអែល​នៅ​ទីក្រុងយេរ៉ូសាលឹម (Jerusalem) នៅ​ថ្ងៃ​ព្រហស្បតិ៍។ លោក​នឹង​បង្ហាញ​ខ្លួន​ក្នុង​សន្និសីទ​សារព័ត៌មាន​រួម​ជាមួយ​លោក Lapid៕